Mbledhje e Këshillit të Investimeve: Adresimi i Sfidave për Përmirësimin e Aksesit në Financë për NMVM-të

Këshilli i Investimeve (KI) zhvilloi mbledhjen e tij të tretë për vitin 2024 nën drejtimin e Ministrit të Ekonomisë, Kulturës dhe Inovacionit, z. Blendi Gonxhja. Axhenda u përqendrua në diskutimin e sfidave me të cilat përballen sipërmarrjet shqiptare në lidhje me aksesin në financim. Në takim morën pjesë pothuajse të gjithë anëtarët e KI-së, si dhe përfaqësues nga Agjencia Kombëtare e Shoqërisë së Informacionit (AKSHI), Agjencia Kombëtare e Kadastrës (ASHK), si dhe vëzhgues nga sektori publik dhe privat dhe agjencitë ndërkombëtare për zhvillim.

Gjatë fjalës së tij, Ministri Gonxhja theksoi rëndësinë e sipërmarrjeve mikro, të vogla dhe të mesme (NMVM-ve) në zhvillimin ekonomik të vendit, duke pranuar sfidat e ndryshme të biznesit, si ngarkesat administrative dhe procedurat burokratike për aksesin në financim, si dhe nevojën për përmirësimin e edukatës financiare dhe digjitalizimin. Ai theksoi iniciativat aktuale të qeverisë për të mbështetur NMVM-të, si programet e granteve nëpërmjet AIDA-s, skemat e garancive sovrane, ligjin e ri për përmirësimin e aksesit në llogaritë bazë të pagesave, si dhe pjesëmarrjen e Shqipërisë në SEPA (Zona e Përbashkët Evropiane e Pagesave). Zëvendësministri Sokol Duma theksoi punën e vazhdueshme për krijimin e një byroje krediti që do të lehtësojë vlerësimin e riskut, gjenerimin e skoreve të kreditit dhe mundësimin e normave të interesit në përputhje me profilin e rrezikut.

Në përputhje me axhendën e mbledhjes, Sekretariati prezantoi analizën e tij bazuar në konsultimet me aktorë kryesorë të sektorit financiar (9 banka dhe 8 institucione mikrofinanciare), si dhe një anketë me 221 biznese. Analiza u përqendrua në faktorët që ndikojnë në vendimet për financim, nivelet e njohurive financiare, ndërgjegjësimin për skemat e garancisë dhe gjendjen e digjitalizimit në sektorin bankar.

Përfaqësues të komunitetit të biznesit, përfshirë Shoqatën Shqiptare të Bankave, Dhomën Ekonomike të Gruas, FIAA, AmCham, Shoqatën Shqiptare të Turizmit, Dhomën e Biznesit të Diasporës, Bashkimin e Dhomave të Tregtisë dhe Industrisë, Shoqatën e Ndërtuesve, Pro-Export Albania dhe Shoqatën “Bashkimi Tregtar Shqiptar”, theksuan nevojën për produkte financimi të personalizuara, si për gratë ashtu edhe për sektorët me nevoja specifike. Ata nënvizuan shqetësimet për normat e larta të interesit dhe kërkesat për kolateral, nevojën për formalizimin e sektorëve si turizmi dhe bujqësia, si dhe përmirësimin e aksesit në shërbimet digjitale të qeverisë përmes platformës e-Albania. Përfaqësuesit e biznesit gjithashtu theksuan adoptimin e kufizuar të sistemeve të pagesave elektronike, nevojën për pranim më të gjerë të dokumentacionit elektronik, rëndësinë e marrjes parasysh të kostove për konsumatorin lidhur me aksesin në byronë e kreditit, nevojën për mbrojtje më të mirë të konsumatorëve dhe mbështetje të shtuar për sektorët e pashërbyer përmes mikrofinancës dhe opsioneve për ndarjen e riskut.

Përfaqësuesit e partnerëve ndërkombëtarë për zhvillim (BE, BERZH dhe Banka Botërore) theksuan rëndësinë e aksesit në financim për bizneset dhe ndanë informacion rreth programeve të tyre specifike të financimit. Ata theksuan nevojën për bashkëpunim më të ngushtë për të përmirësuar njohuritë mbi financimin, për të forcuar kapacitetet e NMVM-ve dhe për të rritur transparencën në këtë fushë.

*****
Materialet e plota të kësaj mbledhje do të publikohen në javët në vijim në seksionin tonë të dedikuar.