Buletini informativ, Tetor – Dhjetor 2025

Sekretariati i Këshillit të Investimeve kontribuoi në takimin e organizuar nga Delegacioni i Bashkimit Evropian në Tiranë, në kuadër të vizitës së Grupit COELA të Këshillit të Bashkimit Evropian, me pjesëmarrjen e përfaqësuesve të 27 shteteve anëtare të BE-së dhe institucioneve evropiane. Gjatë diskutimeve u theksuan disa nga avantazhet konkurruese të Shqipërisë, si për shembull, stabiliteti politik, niveli i taksave dhe tarifave lokale, pozicioni gjeografik strategjik, burimet minerare, si dhe disponueshmëria e fuqisë punëtore të kualifikuar me njohuri të gjuhëve të huaja. Njëkohësisht, u evidentua se kostoja e punës nuk është më në të njëjtat nivele si më parë dhe se emigracioni po shndërrohet në një sfidë reale për sipërmarrjet. Takimi shërbeu gjithashtu për të vlerësuar progresin e bërë, veçanërisht në drejtim të digjitalizimit të shërbimeve publike, si dhe për të adresuar sfidat ekzistuese, me fokus të veçantë në sundimin e ligjit, përfshirë të drejtat e pronës dhe reformat në regjistrimin e tokës, si edhe procedurat e zgjatura në proceset gjyqësore.